رسالة من العالم الاخر

التليفزيون المصري يرفض ظهور البرادعي

استطاع نظام مستبد قهر المصريين لعقود و حدث فيهم الكثير من التغيرات الاجتماعية أدت إلي إنهيار كامل لاخلاقيات الشعب المصري العظيم الاصيل و لكن اصحاب الاصل و الحضارة يستطيعون دوما ان يعودوا الى طريق الصواب و لو بعد حين.

منذ بداية خطة التوريث ظهرت بعض الحركات المستنيرة مثل كفاية و 6 ابريل و كذلك  طل علينا د. البرادعي المصري الاصيل و صوت الحق بكلمة التغيير و كأننا كنا ننتظرها  و التف حوله الملايين املين ان يروا مصرنا الحبيبة تتقدم و تتغير،

 تمت محاربة البرادعي باسوأ و احط الوسائل و للاسف الشديد انساق وراء هذه الاساءات الكثيرين بدون وعي او  تفكير ... فقد اصبحنا لا نعرف كيف نبحث عن الحقيقة لا نبالي بشيء الا حياتنا اليومية و انا و من بعدي الطوفان و يجب ان نعترف ان هذا كان جزءا من مخطط النظام السابق !!! المهم .. من احقر ما قيل عن الدكتور البرادعي انه عميل للامريكان .. ليه ؟؟ عشان سابهم يدخلوا العراق .. و الله كتر خيرك يا اللي مهتم بالعراق كنت فكراك مش فارق معاك حد !! طيب النظام و اعلامه اللي قالوا على رجل بقيمة البرادعي العلمية و الدولية انه عميل .. يا ترى ايه انجازاته و ايه المكانة اللي تخليه يتهم المصري الشريف بالعمالة ؟؟

طيب نقول من الاول :

1- مبارك من نائب رئيس جمهورية اصبح في يوم و ليلة رئيس و ينجح بنسبة 99.9 % مع ان عمرنا معرفنا حد بيروح انتخابات

2- العائلة المباركية شريكة في اغلب الاعمال التجارية بالمحروسة و خارجها

3- حسين سالم الصديق الصدوق و ملك شرم الشيخ اللي اشتراها بتراب الفلوس و عميل لاسرائيل و شريك في تصدير الغاز المصري بتراب الفلوس (واكيد مش حلاقي هنا حد يقول لي اصل التجارة شطارة !!!)

4- المصريين من كل الطبقات و المستويات العلمية و الاجتماعية عمالين يطفشوا و يسيبوا البلد و الاسباب كلها معروفة و طبعا عارفين نتاج ده ايه من ضياع الهوية و تفكيك اسري و انحطاط اخلاقي و ضياع النخبة من العلماء و مرمطة في بلاد الله ... الخ

5- انهيار كامل في منظومة التعليم

6- انهيار كامل لمنظومة وزارة الصحة و حصول مصر على المراكز الاولى في انتشار الامراض زي الالتهاب الكبدي و السكر و السرطان و حتى انفلونزا الخنازير و الطيور

7 - ارتفاع معدلات حوادث الطرق و برضه احتلال المركز الاول فيها

8- انتشار الفساد في جميع القطاعات بلا استثناء

9- 45% امية .. اكتر من 50% تحت خط الفقر .. عارفين يعني ايه المواطن يبقى مش عارف يؤمن احتياجاته اليومية ؟؟ يعني بتحوله لحيوان في غابة

10- ارتفاع معدلات البطالة و العنوسة و الطلاق

11 - سيطرة 10 % من السكان على 80 % من موارد مصر

12- تخريب الدستور المصري و تزويره تمهيدا لخطة توريث حقيرة

13- اهمال كامل للزراعة بمصر لدرجة ان ماكنش عندنا حتى قمح يكفي الاستهلاك و استيراد اغذية فاسدة و حبوب مسرطنة

14- بيع اراضي الدولة لكل من هب و دب بتراب الفلوس

15- خدعة الاستثمارات الاجنبية : خدعوك فقالوا ان النظام السابق استطاع ان يأتينا باستثمارات خارجية و الحق لولا فساد النظام و البلطجة و الاتاوات المفروضة كان الوضع حيختلف تماما

16- تدمير السياحة في مصر : اقصى عدد سياح زار مصر كان حوالي 20 مليون سائح .. و المتوسط 12 مليون سائح بالسنة .. فاللي زعلان اوي على السياحة اليومين دول ما زعلش ليه و فرنسا و اسبانيا بيزورهم سائحين باعداد تصل ل 80 مليون سائح ؟

17- البنية التحتية التي تم تخريبها و انتشار العشوائيات

18- انهيار الفنون بكل اشكالها من عمارة لموسيقى و مسرح و كتابة , مش بس كدة .. مصر حاصلة على مركز متدني جدا في عدد الناس اللي بتشتري كتب و حتى اذا قلنا انه تم استبدالها بالانترنت ف المواقع التي يتم زيارتها بنسب عالية الابراج و الطالع و الفتاوي الدينية !!!

19- قمع كل اشكال حرية التعبير عن الرأي

20 - الاف الحالات التي تم تعذيبها و قمعها داخل السجون و امن الدولة

21- اشعال الفتنة الطائفية

22- الخارجيات : انهيار مكانة مصر بين الدول العربية - الاشتراك في غزو امريكا للعراق - الاشتراك في خطط حصار غزة و تصفية الفلسطنيين و بناء الجدار العازل و غلق معبر رفح !! ده غير المعونة المزعومة اللي كانت بتجيلنا اسلحة فاسدة و الباقي منعرفش عنه حاجة

من كل ما سبق و غيره كتير نرى انه تم تدمير دولة بالكامل شعبا و ارضا و ده اسوأ من اي احتلال و متهيألي ان امريكا و اسرائيل مش حيتمنوا اسوأمن كدة لمصر و المصريين ، و ايه اللي حيدخلهم في حروب ووجع دماغ لما اللي عاوزينه بيجدوه على طبق من دهب ؟؟

ياريت نشغل مخنا شوية ... إزاي اللي ثار ضد النظام هو اللي خائن ؟؟