لماذا الجمعة 27 مايو ؟؟
قبل الاجابة على هذا السؤال ممكن نرجع مع بعض لماضي قريب .. من 4 شهور و بالتحديد يوم الجمعة 28 يناير . اكيد لسة فاكرين كل ثانية من اليوم ده ! لقد كان يوم الغضب المصري ... لقد غضب الشعب و نفض عنه الخوف و قام و زأر في وجه من اعتلى ممبر الفساد 30 عاما .. رأينا في هذا اليوم ما لم نره ابدا و ما عيشنا نتصور انه حلم بعيد المنال .
هذا اليوم قلب كل الموازين و غير وجه القمر مصر ,فقد بدأ اليوم بقطع الاتصالات و الانترنت و من قبلها حملة اعتقالات موسعة و شراسة معاملة من قبل الشرطة (1)و في هذا اليوم استشهد و اصيب عدد رهيب من انبل من انجبت مصر ... لن اسهب اكتر من هذا في وصف اليوم واذكركم بان في هذا اليوم اعلن حظر التجول و فتحت السجون للعتاه و المجرمون و كذلك انسحبت الشرطة و اختفت او اخفيت الى الان لا نعرف اين واخيرا رأينا نزول قوات الجيش للمدن وانتهى اليوم بخطبة رديئة للرئيس المخلوع اعلن فيها صراحة انه يخيرنا ما بين وجوده او الفوضى و رأينا نموذج هذا في نفس اليوم بانتشار منظم للبلطجية و مخبرين عتاه يجوبون المحال التجارية يرمون السلع الغذائية في الشارع لبدء خطة التجويع و الترويع (2)
نماذج الاستبسال التي رأينا منها اجزاء في ذلك اليوم تعجز الكلمات عن وصفها و قد ادمت قلوبنا و لكن في الوقت نفسه قهرت الخوف و جددت فيها الامل . لمن كانوا خارج مصر مثلي في ذلك اليوم و من بعده لم يرفعوا اعينهم عن قناة الجزيرة و إذا اخدتك الوطنية اوي في بعض الاوقات كنت بفتح التليفزيون الصري لترى و تسمع عجب العجاب (3) في بعض الاوقات كدت ارى المذيعين يحاولون توصيل ان كل القوى الاثمة و الشريرة منذ بدء الخليقة تجسدت و توحدت و اجتمعت في ميدان التحرير !! و اصبح الميدان منذ ذك اليوم سبب في الخنقة المرورية في الوادي الجديد !!
عاوزة ارجع للقطة كلنا شوفناها على كوبري قصر النيل اللي كان شاهد على اكثر لحظات طغيان افراد البوليس المصري ... فاكرين الشباب اللي وقفوا صفوف ايدهم في ايد بعض (و منهم بنات مسيحيات) يصلوا امام مدافع المياه الرهيبة و طلقات الخرطوش مش رحماهم, يا ترى ايه اللي كان بيدور في راس اي واحد فيهم في اللحظة دي و هو حاطط نفسه ادام النار عشان بس يحمي اخواته اللي عمره ما كان يعرف عنهم حاجة غير انهم مصريين زيه- افتكرتوا اللقطة دي؟؟ ياترى كام واحد قال من خلال دموعه و الله رجالة و كام واحد قال يستاهلوا ؟؟ ... اه تخايلوا ان في ناس قالت يستاهلوا ؟؟؟!!! - طيب فاكرين اد ايه قيل من النظام (و لن اقول السابق - لاني لا ارى ان التظام اسقط بعد) باعلامه بمريديه ان اللي قاموا بالثورة عملاء لقوى الشر الخارجية ؟؟ (4)
من الجمعة 28يناير ليوم الجمعة 11 فبراير حصل فيهم اللي كتب التاريخ حتكتب فيه دواوين .. بس برضه حفاكركوا بيوم مهم فاكرين يوم موقعة الجمل (5) ؟؟ و بعدها فاكرين شفيق لما طلع اتكلم عن ميدان التحرير يعملوه هايد بارك و كل واحد عنده كلمتين كاتمين على قلبه يروح هناك ! و طبعا في وسط ده كله اللي هو متعب و محزن من وجهة نظري شايفة انه الاكثر ايلاما اللي مالهمش موقف !! هو عاوز يرجع شغله و يعيش حياته و خلاص.(6)
و من يومها فضلوا المكافحين على مبدأهم و المثبطين على منهجهم .
ورحل مبارك ومن بعده شفيق و حبس من حبس ... الخ و كل ذلك لا يتم الا بالضغط الشعبي و لا يتم الا حينما نتكاتف في الميدان.
و شفنا ايام سودة لما الجيش اتمدت ايده على الثوار ... و ايه مش بس كده ده اعتقالات و محاكمات عسكرية لشباب بيطالبوا بالكرامة و الانسانية ... تخيل ..!! ايوة في مصر و بعد الثورة ...!! استنا استنا .. متشدش شعرك دلوقتي لسة اما اكملك الحكاية .. اصلك على نياتك و مش متابع ... كنت فاكر ان كله تمام !!! في وسط ده كله .. يطلع علينا قيادات من الجيش و يقولوا اجندة و عمالة و مؤامرات و وقيعة و شوية و كان حيقول كنتاكي (نرجع لنقطة 3 و 4) !!!! و تباطؤ في محاكمة الفاسدين من النظام السابق و فريرة في الحكم على الشباب و اعلام حكومي و خاص عبارة عن ماكينة اكاذيب و اصبحت السمة نشر الشائعات بشكل مدبر و بعدين نفيها !
و مبارك لسة اخباره و عائلته متصدرة صفحات الجرائد ... !
ده غير انه لم تحل المحليات و تعيين المحافظين كان كارثة و مش حتكلم عن محاولات ايهام الشعب ان الاقتصاد بينهار و فزع التجويع (نقطة 2 )
و اهم جزء بقى الشرطة اللي هربت من امام الثوار يوم 28 يناير و ظهروا امتى ؟؟؟ يوم 20 مايو و طبعا عارفين فين و ليه ؟؟ و لا مش عارفين ؟؟ و عارفين عملوا ايه ؟؟ ... ااااه مين اللي لسة بيقول "احسن " ؟؟ ده ايه الجبروت ده يا اخي ؟؟!! بقى 180 شاب زي الورد يتحكم عليهم باحكام عسكرية في 3 ايام و المخلوع اللي قتل شعب كامل بيتشمس في شرم و تقول احسن ؟؟؟؟ و تدافع كمان عن ساديتك و تقول اصلهم بيقتحموا سفارة ...؟؟!!! بقى ده كلام .. انت ضميرك مرتاح ؟؟
بعد اللي قيل كله و في غيره كتير(انا رقمت بعض النقاط لتوضيح انه اولا مفيش تغيير و ثانيا ان مهما قيل او عمل بتنتصر ارادة الثوار لانها مستمدة من صوت الشارع) ..
المفروض تقول انا نازل الميدان يوم 27 .. عشان انا مصري و غضبان ... و غضبي مش غشيم و لا قليل العقل .. و حقول باعلى صوتي الشعب مازال يريد اسقاط النظام ... مطالب الثورة لا تقبل الالتفاف عليها .. كرامة المصري و انسانيته لا تقبل المناقشة ... دم الشهداء مش حيروح هدر ... و مفيش سكوت و رجوع لورا تاني ... بلادنا سوف نبنيها لتكون ام الدنيا بصحيح
و على اصحاب المصالح و الطموح السياسي الشخصي .. فلتذهبوا للجحيم .. اما مصر فباقية بابنائها المخلصين و ما اكثرهم
